A Fundación para el Desarrollo de la Enfermería (FUDEN) ten un proxecto de Capacitación dos profesionais da enfermaría. Esta fundación ten vinte anos de existencia e naceu para contribuír a través da acción enfermeira a mellorar e aumentar o nivel da saúde das poboacións do mundo e en consecuencia o nivel do Desenvolvemento Humano e, ao mesmo tempo, para conseguir que a saúde sexa un dereito fundamental ao alcance de todas as persoas do mundo.

Toda a información precisa para saber máis desta organización pode atoparse na súa páxina web www.fuden.es.

Persoas destinatarias
Profesionais da enfermaría de Atención primaria e especializada dos centros sanitarios públicos de Galicia.

Obxectivos

1. Desenvolver actos de sensibilización para promover a solidariedade da sociedade e a enfermaría cara os proxectos de cooperación.
2. Mellorar a aportación do colectivo enfermeiro de Galicia ao proceso de desenvolvemento dos Países do Sur, a través da capacitación dos seus profesionais como axentes de sensibilización e educación para o desenvolvemento.
3. Conseguir que este colectivo contribúa de maneira efectiva na planificación, formulación e desenvolvemento das políticas de saúde e por ende, na atención da saúde das poboacións.

Actividades

• Cinco cursos de Introdución á Cooperación para o Desenvolvemento, dirixidos a 125 enfermeiros e enfermeiras das catro provincias galegas, desde novembro de 2008 ata maio de 2009.
• Elaboración e difusión do material realizado para eses cursos.

Se queres consultar ou saber algo máis sobre estas actividades podes contactar con fuden_cooperacion@fuden.es

“FotogÁFRICA, vidas ao redor da SIDA II” é un proxecto de sensibilización que están a desenvolver Médicos do mundo, asociación que ten entre os seus fins non só a intervención directa coas poboacións excluídas no seu dereito ao acceso á saúde se non que tamén realiza accións de sensibilización como medio para o cambio social así como para superar as desigualdades e a inxustiza.
Esta exposición ten a súa orixe na plataforma que Médicos do mundo creou en 1999 chamada SIDA en África: un xenocidio silencioso e que despois se transformou na plataforma SIDA  e Desenvolvemento.

A información completa sobre esta ONG pode atoparse no seu enderezo web www.medicosdelmundo.org.

Persoas destinatarias
Mocidade galega en xeral, tanto estudantes como profesionais en activo ou en paro.

Obxectivos

1. Contribuír á frear a expansión da epidemia do VIH/SIDA na África subsahariana e a mellorar as condicións de vida das persoas afectadas pola mesma.
2. Incrementar a capacidade da poboación galega, atendendo a todo os grupos de idade, para analizar de xeito crítico cales son os efectos do VIH/SIDA en África subsahariana, de xeito que mellore a súa actitude solidaria e a súa mobilización no apoio a iniciativas de loita contra a epidemia.

Actividades

• Montaxe da exposición audiovisual e realización de visitas guiadas.
• Obradoiros de sensibilización.
• Fomento e formación de voluntariado.
• Realización dun video-fórum.
• Actividades para o ámbito educativo, especificamente obradoiros sobre sexualidade e sobre SIDA.

Todas estas actividades desenvolveranse desde setembro de 2008 ata marzo de 2009.

A exposición ten como fíos condutores a SIDA e a saúde; a SIDA e mulleres, a SIDA e estigma, e a SIDA e a pobreza; levarase a cabo en oito cidades da xeografía galega: Noia, Oleiros, Lugo, Vilalba, Caldas de Reis, Baiona, Verín e O Carballiño.

Se queres consultar ou saber algo máis sobre estas actividades podes contactar con galicia@medicosdelmundo.org

“Soberanía Alimentaria” é un proxecto da ONG Veterinarios sen fronteiras, organismo que desde 1993 ven desenvolvendo un amplo labor solidario. Esta ONG adoptou hai catro anos o concepto de “Soberanía alimentaria” como eixe das súas accións. Este concepto consiste nunha estratexia dirixida a garantir que todos os pobos podan producir e consumir alimentos saudables e culturalmente apropiados de forma sustentable. Os proxectos de soberanía alimentaria que esta ONG está a desenvolver no Caribe teñen un enfoque de xénero específico.
Toda a información xeral sobre o traballo que desenvolve esta organización pode consultarse no enderezo electrónico www.veterinariossinfronteras.org.

Persoas destinatarias
Homes e mulleres dedicados a pequena explotación gandeira ou agrícola, así como a mocidade universitaria ou de ciclos formativos superiores relacionados co ámbito da empresa e da produción agrícola.

Obxectivos

1. Conseguir un cambio social en Galicia a favor da soberanía alimentaria dos pobos como novo paradigma para a loita contra a pobreza.
2. Difundir en Galicia a problemática das consecuencias que o actual modelo de consumo agroalimentario está a xerar nos países do Sur e do Norte.

Actividades

• Publicación do libro realizado na campaña “non te comas o mundo”.
• Realización dunhas Xornadas sobre Modelos de Produción en novembro de 2008.
• Realización de seis charlas sobre as implicacións no Sur e no Norte do modelo agroindustrial e alternativas dentro da soberanía alimentaria. Estas charlas efectuaranse nas catro provincias galegas, desde outubro de 2008 ata maio de 2009.

Se queres consultar ou saber algo máis sobre estas actividades podes contactar con vsf@galiciasolidaria.org

Emaús Fundación Social xorde co obxectivo fundacional de mellorar as condicións de vida de todas as persoas en situación ou risco de pobreza e/ou exclusión social. O proxecto “Soberanía Alimentaria para o Desenvolvemento Humano Sostible” ten a súa orixe no Plan estratéxico da fundación, a través do cal explican á poboación as causas da pobreza a nivel mundial, facendo fincapé nas inxustizas que provoca a orde económica mundial.
A información detallada de todas as actividades e proxectos de Emaús Fundación Social está dispoñible a través do seu enderezo electrónico www.emaus.com.

Persoas destinatarias
Toda a poboación galega en xeral, sobre todo a mocidade galega

Obxectivos

1. Sensibilizar á sociedade galega sobre as causas que xeran as situacións de pobreza e exclusión social.
2. Espertar a conciencia de que a loita contra a fame e a pobreza no Sur tamén debe poñer en pano de xuízo o modelo de desenvolvemento do Norte.
3. Fomentar a participación dos diferentes axentes sociais (ONG, sindicatos, asociacións, etc) na promoción da Soberanía alimentaria como proposta de loita contra a pobreza.
4. Reflexión sobre o paradigma de comercio xusto e do concepto de Soberanía Alimentaria.

Actividades

• Realización do Foro on-line sobre Soberanía Alimentaria que ten lugar a través da páxina web www.cooperacionsolidaria.org.
• Posta en marcha dun grupo de traballo que estará operativo ata marzo de 2009, co fin de establecer o enfoque da Soberanía Alimentaria a traballar e facer un seguimiento do proxecto, con apoio dunha organización do Sur.
• Realización dunhas xornadas sobre Soberanía Alimentaria en marzo de 2009.

Se queres consultar ou saber algo máis sobre estas actividades podes contactar con galicia@emaus.com